16.07.2025. (Caucasian Journal) საქართველოს ევროპული მისწრაფებებისთვის ამ კრიტიკულად მნიშვნელოვან პერიოდში, ჩვენი ჟურნალი მიზნად ისახავს, წვლილი შეიტანოს საზოგადოების ინფორმირებაში ევროკავშირის კანდიდატობისა და ინტეგრაციის უმნიშვნელოვანესი ასპექტების შესახებ. ერთ-ერთი ყველაზე მნიშვნელოვანი თემა, რომელიც ხშირად არასაკმარისად შუქდება, ევროკავშირის სურსათის უვნებლობის რეგულაციებია. დღეს ჩვენ სურსათის რეგულირების სამყაროს ჩვენს გამორჩეულ ექსპერტთან, დოქტორ კაი პურნჰაგენთან ერთად ჩავუღრმავდებით.
პროფესორი პურნჰაგენი ბაიროითის (გერმანია) უნივერსიტეტის სურსათის სამართლის კათედრას ხელმძღვანელობს, სადაც ის ასევე გერმანული და ევროპული სურსათის სამართლის კვლევითი ცენტრის თანადირექტორია. ის არის ავტორიტეტული ნაშრომის, „ევროკავშირის სურსათის სამართალი“ (ოქსფორდის უნივერსიტეტის პრესა), თანაავტორი.
▶ In English: ინგლისური ვერსია წაიკითხეთ აქ.
ალექსანდრე კაფკა, კავკასიური ჟურნალის მთავარი რედაქტორი: ძვირფასო დოქტორო პურნჰაგენ, გმადლობთ, რომ დრო დაგვითმეთ. ნება მომეცით, დავიწყო იმ მარტივი შეკითხვით, რომელიც ევროკავშირის კანდიდატი ქვეყნის ბევრ მოქალაქეს შეიძლება დაებადოს: მნიშვნელოვნად გაუმჯობესდება თუ უკეთ იქნება დაცული ჩემი საკვების ხარისხი, როდესაც ჩვენი ქვეყანა ევროკავშირში შევა?
კაი პურნჰაგენი: დიდი მადლობა მოწვევისთვის, ეს ჩემთვის დიდი პატივია. მე საკმარისად არ ვიცნობ საქართველოს სურსათის სისტემას, რომ თქვენს შეკითხვას ამომწურავად ვუპასუხო. მაგრამ რაც ნამდვილად ვიცი, ისაა, რომ ევროკავშირს აქვს ყველაზე მკაცრი აგროსასურსათო სამართლებრივი სისტემა, როდესაც საქმე სურსათის უვნებლობას ეხება. დიდად სავარაუდოა, რომ ამ კუთხით ქართული სურსათის ხარისხი გაუმჯობესდება. ექნება თუ არა ეს გავლენა სურსათის ფასებზე, დიდწილად დამოკიდებული იქნება იმაზე, თუ რამდენად კარგად იმუშავებენ საქართველოს კონკურენციის მარეგულირებელი ორგანოები. ჩვენ ვნახეთ, რომ ევროკავშირის იმ ქვეყნებში, სადაც კონკურენციის კანონის აღსრულება კარგად მუშაობს, სურსათის ფასები, უვნებლობასა და ხარისხთან შედარებით, საკმაოდ დაბალ ნიშნულზე შენარჩუნდა.
